There was a lad was born in Kyle, But whatna day o' whatna style, I doubt it's hardly worth the while To be sae nice wi' Robin. Chor. - Robin was a rovin' boy, Rantin', rovin', rantin', rovin', Robin was a rovin' boy, Rantin', rovin', Robin! Our monarch's hindmost year but ane Was five-and-twenty days begun 'Twas then a blast o' Janwar' win' Blew hansel in on Robin. Robin was, &c. The gossip keekit in his loof, Quo' scho, "Wha lives will see the proof, This waly boy will be nae coof: I think we'll ca' him Robin." Robin was, &c. "He'll hae misfortunes great an' sma', But aye a heart aboon them a', He'll be a credit till us a' -- We'll a' be proud o' Robin." Robin was, &c. "But sure as three times three mak nine, I see by ilka score and line, This chap will dearly like our kin', So leeze me on thee! Robin." Robin was, &c. "Guid faith," quo', scho, "I doubt you gar The bonnie lasses lie aspar; But twenty fauts ye may hae waur So blessins on thee! Robin." Robin was a rovin' boy, Rantin', rovin', rantin', rovin', Robin was a rovin' boy, Rantin', rovin', Robin! | Discover our Poem Explanations and Poet Analyses!Other Poems of Interest...CHAMBER MUSIC: 33 by JAMES JOYCE A FINE DAY by KATHERINE MANSFIELD THE GOLDEN CORPSE by STEPHEN VINCENT BENET THE SEMANTICS OF FLOWERS ON MEMORIAL DAY by BOB HICOK PRAYER AT SUNRISE by JAMES WELDON JOHNSON THE GOLDEN WEDDING OF STERLING AND SARAH LANIER by SIDNEY LANIER WITH CHAOS IN EACH KISS by TIMOTHY LIU |