"THE BONNY HOUSE O' AIRLY [OR, BONNIE HOUSE O' AIRLIE]" by ANONYMOUS

It fell on a day, and a bonny simmer day,
When green grew aits and barley,
That there fell out a great dispute
Between Argyll and Airlie.
Argyll has raised an hunder men,
An hunder harnessed rarely,
And he's awa by the back of Dunkell,
To plunder the castle of Airlie.
Lady Ogilvie looks o'er her bower-window,
And oh, but she looks weary!
And there she spy'd the great Argyll,
Come to plunder the bonny house of Airlie.
"Come down, come down, my Lady Ogilvie,
Come down, and kiss me fairly:'
"O I winna kiss the fause Argyll,
If he should na leave a standing stane in Airlie.'
He hath taken her by the left shoulder,
Says, "Dame where lies they dowry?'
"O it 's east and west yon wan water side,
And it's down by the banks of the Airlie.'
They hae sought it up, the hae sought it down,
They hae sought it maist severely,
Till they fand it in the fair plumb-tree
That shines on the bowling-green of Airlie.
He hath take her by the middle sae small,
And O, but she grat sairly!
And laid her down by the bonny burn-side,
Till they plundered the castle of Airlie.
"Gif my gude lord war here this night,
As he is with King Charlie,
Neither you, nor ony ither Scottish lord,
Durst avow to the plundering of Airlie.
"Gif my gude lord war now at hame,
As he is with his king,
There durst nae a Campbell in a' Argyll
Set fit on Airlie green.
"Ten bonny sons I have born unto him,
The eleventh ne'er saw his daddy;
But though I had an hundred mair,
I'd gie them a' to King Charlie.'

Classic and Contemporary Poetry

Discover our Poem Explanations and Poet Analyses!

Other Poems of Interest...